Magnús Skúlason

Margar feitar í sigtinu

Ég fór á gæsaveiðar í morgun. Halli mágur bauð mér og Munda mági mínum að fara á gæs. Hann komst ekki sjálfur. Á Læk í Hraungerðishreppi eru kornakrar sem ekki hefur verið hægt að þreskja vegna rigninga. Gæsin er farin að gerast full ágeng og kornið því í voða.

Mundi undir regnboganum. Hvað skyldi hann hafa óskað sér?

Við Mundi vorum mættir á svæðið uppúr kl. 6 í morgun og stilltum upp gerfigæsum og álftum eins og tíðkast. Það var að vísu erfitt að gera þetta mjög vísindalega vegna þess að það var logn. Semsagt engin vindátt. En þrátt fyrir allt þá virtist þetta hafa verið nokkuð góð uppstilling hjá okkur.

Ég í "byrginu"

Við komum okkur svo fyrir í skurðruðningi í "holum" sem síðasta skyttugengi hafði gert.

Veðrið var mjög gott fyrir útiveru. Logn og þurrt. Það er að vísu ekkert sérstakt veiðiveður fyrir gæsaveiðar en það er aldrei á allt kosið.

Tumi var vel vakandi.

Tumi kom með sem veiðihundur. Hann stóð sig með stakri prýði eins og venjulega. Hann hafði að vísu meira að gera en hann er vanur upp á síðkastið og var orðinn nokkuð lúinn þegar upp var staðið.

Tumi með eina af mörgum.

Veiðarnar gengu semsagt vel. Það komu gæsir í færi öðru hvoru og við slitum niður eina og eina allan morguninn. Smá saman stækkaði staflinn með gæsunum sem Tumi sótti. Það var erfitt fyrir hann að leita í korninu því að það var enginn vindur til að bera lyktina. Hann þurfti því að hlaupa miklu meira en ella. Allar gæsirna sem við skutum fundust samt þótt að það þyrfti að hafa mikið fyrir því stundum og leggja mikið á sig.

Tumi blóði drifinn

Meðan við biðum eftir gæsunum þá höfðum við Mundi nægan tíma til að spjalla. Efnahagsmálin og bankarnir voru vinsælt umræðuefni meðal annars.

Og haugurinn stækkaði!

Við hættum veiðinni fyrir hádegið og tókum saman. Saddir og sælir. Ég er að minnsta kosti búinn að redda megninu af þeim gæsum sem við þurfum fyrir veturinn. Vantar samt aðeins uppá enn.

Tumi með fenginn