Sjálfstætt fólk

"Ég segi fyrir mig, maður fer á mis við lífið þángaðtil maður er orðinn sjálfstæður. Fólk sem ekki er sjálfstæðisfólk, það er ekki fólk. Maður sem ekki er sjálfra sinna, hann er einsog hundlaus maður"

Bjartur í Sumarhúsum

Ég hafði það loksins af síðastliðið vor að lesa Sjálfstætt fólk. Það var ansi skemtileg lesning. Ég hef hugsað um það undanfarið hvað ástandið hér á landi er líkt mörgu af því sem Bjartur  gekk í gegnum. Hann vildi umfram allt vera sjálfstæður og ekki upp á aðra kominn með nokkurn hlut.

Þegar Bjartur hugðist bæta aðstöðuna og byggja hús "Þegar maður á lífsblóm þá byggir maður hús" Þá fór að halla undan fæti. Hann tók lán í kaupfélaginu og byggði hús sem hann gat að vísu aldrei notað. Svo gerðist hann áhættufjárfestir með því að setja meira á af lömbum en venjulega en þá gerir einmitt harðan langan vetur og hann verður heylaus.

"Maður er þó ævinlega sjálfstæður maður heima í kotinu sínu. Hvort maður lifir eða drepst, þá kemur það aungvum við utan manni sjálfum. Og einmitt í því álít ég að sjálfstæði sé fólgið"

"En meðan ég sælist ekki eftir annara manna gróða þá kæri ég mig ekki um að bera annara manna töp"

"Að leita til annara manna það er sjálfstæðum manni uppgjöf á vald höfuðóvinarins.."

Þessi saga er full af svona gullkornum sem eiga vel við á okkar tímum.

 

Athugasemdir

[Guðný (IP-tala skráð) 30.10.2008 kl. 18:19]

"og þetta er hamingjan sjálf: að bíða í eftirvæntingu komandi dags.." annað gott quote úr Sjálfstæðu fólki.

[Helga Ágústsdóttir (IP-tala skráð) 5.11.2008 kl. 18:27]

Ætli íslenska þjóð dagi brátt uppi, hundlausa með öllu, heimalninginn horfinn og étinn; og höfuðóvininn á hlaðinu?

Ja, það eina ,sem hægt verður þá að þakka fyrir er að sleppa við Rauðsmýrarmaddömuna - að sinni. Eða er hún kannski í nokkrum valdastólum hérlendis? Og enn að flytja mærðarræður. - Komin í sjónvarpið fyrir stóra peninga að flytja okkur heilræðin? Skyldi þó aldrei vera!

"Elsku veriði góð við hvert annað" segir hún núna. Assstninn sá. Við höfum nú ekki verið að berja á hvort öðru svo neinu nemi, hingað til! Undur sem fólk getur verið ... (hugsa, vanda sig...) "lítt vaxið til vitsins" og vanmetið hinn venjulega, ærlega Íslending.

Skrifað með vinsemd,

en í mínum hógværa hroka

Helga Ág.